75 onns Museum Sursilvan - Cuort Ligia Grischa Trun 1934 - 2009

Al cunfin vest dil vitg da Trun sesanfla in dils pli bials ed imposants edifecis historics dalla Surselva, ch’ei vegnius eregius ils onns 1774-79 digl avat Adalbert II da Medell. Quella cuort claustrala ed anteriura casa-cumin dalla Ligia Grischa ha la claustra da Mustér vendiu ord motivs finanzials igl onn 1859 a Gion Giachen Cavegn da Dardin. Siu frar e ses vegnentsuenter (Cavegn, Demont, Pajarola) ein stai ils migiurs. Els han denton buca pudiu mantener quei edifeci d’impurtonza historia ed atistica ed han entschiet a vender objects custeivels digl interiur. Per impedir che tut mondi giu la Bassa ei in comité d’iniziativa cun representants dil cantun, dalla vischnaunca e dalla Viafier retica s’engaschaus ed ha saviu cumprar 1932 igl edifeci cun sustegn dalla confederaziun, dil cantun e dallas vischnauncas. Suenter sia renovazioun eis el vegnius surdaus alla Fundaziun Cuort Ligia Grischa. Lezza ha endrizzau en las localitads historicas in museum d’historia locala e regiunala, da cultura populara e d’art. 1934 ha quei Museum Sursilvan saviu vegnir aviarts ed uonn festivescha el siu 75avel anniversari.

Il Museum Sursilvan ha festivau, la sonda, ils 29 d'uost 2009, il giubileum da 75 onns.