30-01-2020  

Directivas agids da catscha 

Informaziuns

 

Annunzia d’agids da catscha sin il territori dalla vischnaunca Trun

La vischnaunca Trun inventarisescha tut ils sezs da catscha, las hettas da laghetg e las largias da sittar. Quei inventari gida agl uffeci forestal Trun tier la planisaziun dallas lavurs forestalas. La vischnaunca vul cun dar lubientschas per agids da catscha megliurar las cundiziuns da sittar egl uaul. La capientscha ed il sustegn dallas catschaduras e dils catschadurs ei necessaria.

Tut ils possessurs da posts (giun plaun e sin plontas) cun travestgida laterala e tetg, sezs aults, hettas da laghetg, ein supplicai d’ annunziar quels cun il formular ch’ei publicaus sin la pagina d’internet dalla vischnaunca sut http://www.trun.ch/publicaziuns. Il formular en fuorma da pupi sa vegnir retratgs tier l’administraziun communala.

Igl uffeci forestal ha gia lubiu dabia sezs da catscha enteifer ils davos onns. Ord il motiv che plirs sezs han midau possessur ni vegnan buca duvrai pli, ein tut ils sez gia lubi d’annunziar danovamein.

Termin d’annunzia: Ils 31 d’uost 2020 tier igl uffeci forestal Trun, via Splecs 22, 7166 Trun / tel. 079 417 49 57, mail: mattias.cadruvi@kns.ch

La vischnaunca vegn a pretender d’allontanar;

  • agids da catscha ch’ein buca annunziai entochen la fin d’uost 2020
  • agids da catscha  che adempleschan buca allas directivas  per la construcziun
  • novs agids da catscha che vegnan construi senza la lubientscha dalla vischnaunca
  • agids da catscha che disturban la raccolta da lenna

La contrucziun da novs agids da catscha basegnan ina lubientscha dalla vischnaunca ed ein d’annunziar agl uffeci forestal.

Largias da sittar astgan vegnir fatgas ni engrondidas mo cul consentiment digl uffeci forestal e pér suenter ch’ ellas ein vegnidas marcadas ni indicadas entras il selvicultur.

Bugen dat igl uffeci forestal sclariment tier damondas e stat a disposiziun per propostas.

Grond engraziament per vies agid.

Vischnaunca Trun/Uffeci forestal Trun

Directivas per la construcziun d'agids da catscha

Formular d'annunzia

 

Info dalla vischnaunca

  • Administraziun communala
  • Via Dulezi 1
  • Caum postal 91
  • 7166 Trun
  • Tel. 081 920 20 40
  • Fax 081 920 20 49
  • E-Mail
  • Contact
  • Uras da spurtegl
  • Gl - Gi: 9.30 - 11.30 / 15.30 - 17.30
  • Ve: 9.30 - 11.30 / 15.30 - 17.00