Preziada convischina
Preziau convischin
Cun quest muossavia informein nus Vus convischinas e convischins davart il project TRUN EGL AVEGNIR 2016.
Nus havein plascher da presentar oz a Vus las pusseivladads e las ideas che persunas da Trun han elaborau ensemen cun studentAs dalla scol’aulta da Lucerna e cun Urs Giezendanner ed Urs Brandenburger en differentas gruppas da lavur.
Il sboz dil project ei vegnius presentaus schibein al cussegl da vischnaunca sco era a caschun dalla radunonza da vischnaunca digl avrel 2011. Cun plascher havein nus constatau ch’il project ha anflau buna accoglientscha. Quei ha dau a nus anim da continuar cun quella lavur ed aschia eisi stau impurtont da fixar ina gruppa da lavur che duei metter ils singuls projects sin via.
Gruppa da lavur:
Donat Albin Simon Bundi
Renata Decurtins-Deplazes Donat Nay
Gion Simeon Dumeni Tomaschett
Gabriela Tomaschett-Berther Curdin Tuor
Urs Giezendanner Rita Wolf, Secretariat
Per mantener e crear novs plazs da lavur eisi impurtont che Trun vivi. Quei duei era dar anim da vegnir e visitar Trun, far vacanzas a Trun, prender investa dallas bellezias culturalas, serecrear, far sport, gie forsa schizun vegnir a habitar a Trun. Nus lein vinavon esser loschs sin nossa vischnaunca, sin nossa cuntrada e sin nossa purschida. Trun duei esser ina vischnaunca attractiva, cun in turissem migeivel e perquei luvrein nus en quella direcziun.
Naturalmein che nus savein buca realisar dad in di sin l’auter tut quei ch’ei presentau el muossavia, mo nus mein pass per pass en quella direcziun. Cun Vies sustegn savein nus dir: „Nus essan loschs da Trun, Trun amiez il cor dalla Surselva“.
Culs megliers giavischs e plein speronza pigl avegnir salidan en num dalla vischnaunca, dalla suprastonza communala e la gruppa da lavur
il president sco representant per l’informaziun
Donat Nay Simon Bundi
Trun, uost 2011