Maletg empalont
Preziadas vischinas e preziai vischins da Trun
Preziadas lecturas, preziai lecturs
En in temps da midadas permanentas e da progesss eis ei zun impurtont per la suprastonza communala ed il cussegl da vischnaunca da planisar igl avegnir ed il beinstar dalla vischnaunca cun vasta egliada e d’empalar ella viers in futur empermettent. Quei garantescha in svilup pils proxims onns che sebasa sin ils fatgs e basegns actuals.
Cul present maletg empalont vul la suprastonza communala ensemen cun il cussegl da vischnaunca metter a disposizun in instrument per in svilup moderau per nossa vischnaunca. Ei munta ina gronda sfida da saver metter sut in tetg la varietad dils pensums ch’ein avon maun ni che spetgan sin nus sco era da dar suatientscha allas pretensiuns ed al basegns dalla populaziun.
El center stat la finamira da saver proscher allas vischinas ed als vischins da Trun ina vischnaunca cun gronda qualitad da viver.
Nossa vischnaunca sepresenta da maniera rurala, denton tuttina moderna ed aviarta. Ella posseda ina cuntrada attractiva, porscha denton bia pusseivladads economicas. Ella porscha ina vasta paletta el sectur da turissem e temps liber. Potenzial da svilup ei avon maun; e quel ha ei num da nezegiar cun responsabladad, mirond egl avegnir e cun risguardar ils principis economics, socials ed etics. Projects creativs e prospereivels sesviluppeschan leu nua che habitonts, purschiders da survetschs e da commerci s‘entaupan e surprendan la resca da persequitar communablamein e consequentamein vias novas. Cul project cumplessiv „Avegnir Trun plus 2015“ vegn fatg in impurtont pass el futur.
La suprastonza communala ed il cussegl da vischnaunca engrazian a tut quellas e quels ch’han contribuiu alla elaboraziun dil maletg empalont present, mo era a tut tgi che vegn a collaborar activamein vid la realisaziun.