Cumissiun da cultura

Logo Cumissiun da cultura

Cun l’entschatta digl onn 2018 ha ina nova perioda d’uffezi per la cumissiun da cultura entschiet. Biars onns ha quella cumissiun funcziunau sco sulet gremi en vischnaunca senza reglamentaziuns ni leschas. Quei ei buca il davos il meret dallas persunalitads ch’ein stadas engaschadas ella cumissiun. Culs onns ei denton il scazi cultural dalla vischnaunca carschius ed ils cunfins denter bein cultural e bein turistic ein sblihi tec a tec. Ensemen cun entgins onns da pauca activitad ha quei menau ad ina situaziun nuncuntenteivla dalla cumissiun, signada d’ina munconza da finamiras e bia damondas aviartas. Ord quei motiv ei il pensum principal dalla cumissiun da cultura en nova cumposiziun staus da sclarir las damondas, definar novas finamiras ed aschia sviluppar da novamein igl intent dalla cumissiun da cultura. Il muossavia ch’ei seresultaus ord quellas lavurs ei gl’emprem pass sin la nova via che la cumissiun ha priu.


 

 


Inventari cultural

In pensum dalla cumissiun da cultura ei l’elaboraziun d’in inventari cultural. Quei inventari duei cuntener tut ils beins culturas ch'ein avon maun en vischnaunca, cun la finamira, d'haver ina survesta dils tals ed aschia saver promover e mantener quels beins.

In emprem sboz ei vegnius fatgs en collaboraziun cun Trun Turissem. Il sboz ei – sco il plaid gi – in’emprema versiun digl inventari ed ei buca cumpleins. Aschuntas, correcturas e remarcas ein beinvegnidas!


 

 


Meisa culturala

Igl intent dalla cumissiun ei da promover, sustener ed animar la cultura en vischnaunca. A liunga vesta il pli impurtont eis ei denton d’ina vart da collaborar cun autras uniuns, fundaziuns, cumissiuns ni instituziuns sco era da l’autra vart da promover talas collaboraziuns. La cumissiun da cultura vesa cheu sesezza en la rola d’intermediatur e la meisa culturala ei pia in’emprova d’intermediar denter las uniuns ed organisaziuns culturalas en vischnaunca cun la finamira da promover la collaboraziun. La meisa culturala duei esser ina sentupada voluntaria e regulara denter representants da tuttas uniuns ed organisaziuns culturalas e duei dar la pusseivladad da dumandar ed era porscher agid ni sustegn vicendeivel, ella duei esser ina plattafuorma per ideas e projects - ed aschia la finala promover la collaboraziun.

La meisa culturala ei in project da pilot dalla cumissiun da cultura en collaboraziun cun Trun Turissem e cuozza 1 onn. Suenter quei onn vegn tratg bilanza e decidiu davart il futur dalla meisa culturala. Las sentupadas han mintgamai liug igl emprem vendergis el meins allas 20:00 uras (midadas pusseivlas) e quei en fuorma da meisa rodunda: senza tractandas e protocols – in representant dalla cumissiun da cultura vegn denton a menar ton sco necessari las sentupadas, che cuntegnan suandonts puncts fix:

- Beinvegni, appel ed informaziuns: per saver trer bilanza suenter in onn vegn fatg in cuort appel, sche avon maun dat la cumissiun da cultura atras informaziuns necessarias

- Calender d’occurenzas: la cumissiun da cultura rimna termins e publichescha tenor giavisch quels sin la pagina d’occurenzas dalla vischnaunca e tut tenor era sur Surselva Tourismus, medemamein informescha ella surda occurenzas che han liug el meins proxim

- Presentaziun d’ina organisaziun: per saver collaborar ston ins era enconuscher il partenari. Ord quei motiv survegn mintga organisaziun la pusseivladad da sepresentar duront quei onn – per far reclama per l’atgna uniun sco era per informar las ulteriuras uniuns surd’igl intent e la lavur dall’atgna uniun. Quella presentaziun sa succeder a moda sempla entuorn meisa rodunda, ni era gest el „dacasa“ dall’uniun, cumbinau cun ina guida ni semegliont

- Prevista sin la proxima meisa culturala: informaziun surda datum, liug ed organisaziun che sepresenta alla proxima meisa culturala

La meisa culturala sentaupa mintgamai en in’ustria dil vitg ni, tut tenor organisaziun che sepresenta, era gest el liug dall’organisaziun. Tuts termins incl. liug vegnan publicai schibein sin la pagina d’occurenzas dalla vischnaunca sco era en il FUS.


Prevista sin la proxima meisa culturala

Datum:                5 da fenadur, allas 20:00 uras

Liug:                    Ustria Chispacius, Schlans

Organisaziun che sepresenta:   Club da Jass Schlans, Uniun da giuventetgna Schlans, Pro Schlans, Club da skis Schlans

Informaziuns supplementaras:

Nus sentupein ell'ustria Chispacius per las informaziuns ed il brat d'occurenzas, sco era per la presentaziun dallas uniuns. Silsuenter dat ei ina guida tras il vitg da Schlans per scuvierer details forsa aunc buca enconuschents dil vitget.

Nus selegrein sin stedia participaziun!


Info dalla vischnaunca

  • Administraziun communala
  • Via Dulezi 1
  • Caum postal 91
  • 7166 Trun
  • Tel. 081 920 20 40
  • Fax 081 920 20 49
  • E-Mail
  • Contact
  • Uras da spurtegl
  • Gl - Gi: 9.30 - 11.30 / 15.30 - 17.30
  • Ve: 9.30 - 11.30 / 15.30 - 17.00