Turissem
Trun ei ina vischnaunca activa e simpatica che schai el cor dalla Surselva, denter Glion e Mustér. A Trun dat ei dabia attracziuns historicas ed artisticas: Il Museum Sursilvan Cuort Ligia Grischa, la baselgia parochiala, la caplutta da s. Onna cugl ischi, nua che la Ligia Grischa ei vegnida engirada. A Trun san ins viandar sils fastitgs dad Alois Carigiet ed admirar sias picturas muralas, denton era emprender d’enconuscher auters artists. A Trun san ins guder la ruasseivladad, denton era far sport. Trun ei il punct da partenza per biaras bialas spassiadas e turas. Da Trun anora san ins contonscher en cuort temps ils territoris da skis dalla Surselva sura: Mustér, Sedrun, Breil, Sursaissa eav. Ei dat era ina buna purschida culinarica, surtut el Hotel Casa Tödi. Trun porscha dabia e beneventa cordialmein in e scadin. Vegni pia ina gada a Trun e nus essan perschuadi che Vus returneis puspei tier nus.
